المشاكل ال بتواجه اي حد داخل الجامعه وبذات في سنه اولى هي الكتابه وتسجيل الملاحظات وبذات ان في بعض الدكاتره شرحهم سريع حبتين فيحصل حاله من التشتت اركز على الفهم من الدكتور واكتب بعدين ولا اكتب دلوقتي وافهم بعدين وفي الحالتين في معلومات بتقع منك وبتتنسي .
وده بيخليك تحس انك ضايع وحالة من الخوف انك مش عارف تتأقلم مع المرحله الجديده ال انت بتمر بيها في حياتك
الموضوع مش محتاج خوف ولا قلق ولا اي حاجه خالص محتاج حبة تفكير وبحث بطريقه منطقيه كده تعالى نشوف هنعمل ايه ؟
في جامعه اسمها كورنيل عملت طريقه بسيطه جدا لاخذ الملاحظات اثناء المحاضره اسمها طريقة كورنيل والطريقه كالتالي
هتجيب ورقه بيضه "ورق التصوير " وهتقسمها بالشكل ده
في قياسات معينه بس الافضل متربطش نفسك بقياسات وخلي عندك نظره لتقسيم ورقتك وكمية المعلومات ال انت هتكتبها في المحاضره
شرح بسيط بقى الجزء رقم 1 ده
هتكتب فيه معلومات بسيطه تساعدك على تنظيم ورقك بعدين زي مثلا
الماده
الموضوع
اسم الدكتور
التاريخ
الجزء التاني ال هو رقم 2
هتكتب فيه المعلومات ال الدكتور بيقولها المعلومات المهمه بس وهتقسمها كخرائط ذهنيه بسطيه جدا تساعدك في ربط المعلومات مع بعضها
لو بتتكلم عن وظائف الكبد اكتب حاجه بسيطه جدا
الحاجه الاساسيه "عنوان كبير" وظائف الكبد واخرج منه بفروع ال هي 1- تنقيه 2- تخزين 3-تكوين
مثلا يعني
الجزء التالت رقم 3
ده بقى الجزء الفهلوي وانت وشطارتك مثلا
الدكتور قال كلمه غريبه عشان يفكرك بالمعلومه انت حضر في ذهنك كلمه تفكرك بالمعلومه اكتبها فيه
اكتب سؤال الدكتور قاله تكون اجابته في الجزء رقم 2 هتلاقي نفسك كتبت كم كبير جدا من المعلومات في ورقه واحده
الجزء الرابع رقم 4
ده بعد المحاضره تلخيص لاهم الحاجات ال انت استفدتها
انا استفدت ايه من المحاضره بالعربي بالانجليزي مش مهم اهم حاجه تكتب ملخص للمحاضره بعدها على طول في نقاط اساسيه عريضه بيساعد في تثبيت المعلومه
ازاي بقى تخرج باكبر قدر من الاستفاده ؟
راجع الورق ال انت كتبته في خلال اليوم وانت في المواصلات او في الوقت الفاصل بين محاضرتين الوقت ال هتستغرفه بالضبط عشر دقايق كمتوسط بس الاستفاده كأنك ذاكرت ساعتين
وده فيديو بيشرح الطريقه
في الاخر المذاكره مش مجهود بس المذاكره محتاجه تفكير وعقل متبقاش دحيح ابقى سنتيح وشغل دماغك هتطلع باكبر قدر من الاستفاده باقل وقت ومجهود ممكنين
ربنا يوقفنا
0 التعليقات: